De 27. November 2018 wor d'Eierung vun de Vëlosfuerer déi, fir hier Gemeng aus dem Réidener Kanton, beim Tour du Duerf 2018 ugetruede sinn a Kilometer gesammelt hunn.

No engem kuerze Wëllkommenswuert vum Präsident vum Syndikat vum Réidener Kanton, dem Thierry Lagoda, hunn d'Antonia Schmit an de Laurent Schaus vun Ell een immens flotten an lëschtege Virtrag mat Film iwwer hier Vëlosrees op d'Mëttelmier gewisen.

Duerno sinn d'Gewënner aus den 3 Kategorien geéiert ginn:

- Gemeng mat de meeschte Kilometer: Wahl  mat 7.942 km

- Team mat de meeschte Kilometer: Oppen Team Wahl mat 4.615 km

- Vëlosfuerer mat de meeschte Kilometer: Stefan Meilinger mat 1.401 km

 Mir félicitéieren all de Gewënner a wënschen hinnen ee gudden Appetit beim gemeinsamen Iessen!

  

Du goufen di 2 Bongen vun der Vëlosrees op der Vennbahn verloust. Gewënner hei wor de Noah Reuter vu Kéiber! Mir félicitéieren him a wënschen him a senger Famill eng immens spannend Rees op der Vennbahn!

Uschléissend ass d'Vëloskonzept vum Réidener Kanton virgestallt ginn. Hei fannt Dir d'Ennerlagen.

Folgend Iddie si vum Publikum bei der Diskussioun genannt ginn:

- de Moment gëtt no enger Verbindung tëschent Rammerich  a Wahl / Grevels gesicht, déi net iwwer den C.R. fiert

- et ass wichteg, dass een de Vëlo ka sëcher ofstellen an dëst och an der Fräizäit, wéi zB op Bus-Arrêten. Hei soll een eenheetlech Konzept fir d'Vëlosstänneren erstallt ginn fir de ganze Kanton.

- d'Planung vun der P.C. 25 - Useldeng - Iewerleng - Reimberg - Groussbus - Mäerzeg - Feelen ass no engem Stillstand wéinst waasserschutzgrënn rëm relancéiert. Ee Bureau ass mam Projet beoptragt ginn a schafft enk mat der Ponts & Chaussées an de concernéierte Gemengen zesummen.

- Am Kanton solle mir versichen ze weisen, dass de Vëlosfuerer wellkommen ass. An dëst duerch verschidden Aktiounen:  gutt & secher Ofstellméiglechkeeten (Schwëmm, Lycée,...), Oplued-Statiounen fir d'E-Vëloen (Sticker "We fill battery" fir Restaurants/Caféen wou Batterie kënnen opgeluedt ginn)

- Et ass ganz wichteg, dass d'Sensibilisatioun fir de Vëlo scho ganz fréi ufänkt, an zwar an de Schoulen. Hei muss den Hiewel ugesat ginn an d'Gewunnescht fir de Vëlo ze notzen entstoen. De Kanton soll kucke, fir mat de Schoule méi intensiv zesummen ze schaffen.

- innerhalb vun den Uertschaften mussen d'Vëloe leider mam motoriséierte Verkéier fueren, wat net zu engem héije Sëcherheetsgefill bäidréit. Fir d'Kanner op de Vëlo ze kréie, wier et deemno ubruecht, op kritesche Plazen den Trottoir mat Poteau ofzesecheren.

 Mir soen all de Vëlosfuere, déi deen Owend komm sinn, villmools Merci.